分心慢吞吞

咩叫做容易分心？咪好似我寫緊哩個blog，
寫寫吓又玩facebook又msn，signout咗又login番，
本來想寫啲嘢，已經完全唔係果回事。

人大咗，正常了解自己都會多咗，
最近公司的確無咁忙，私人時間大增，
以前諗落啲idea，以為可以好快咁實行，
不過我就係成日衰分心...

今朝諗定今晚整咩做咩，返到屋企又另外一回事。
想做啲嘢明明唔係人地逼，係自己啲目標嚟，
偏偏一做果陣又會突然無mood，我自己寫出嚟，
都覺自己好無謂。

其實都有方法補救，就係盡量將想做啲嘢揚出去，
或者搵志同道合嘅人士，拖埋佢落水。
有時多個人睇住，我又會好鬼自發性咁做喎。

聽日有兩日假，唔該真係唔好嘥晒啲時間，
快啲寫好個故事，再攞出嚟傾好佢。
仲要搵資料同搵人做哩...兩個月好快到咋！

我諗我都要用番佐藤可士和個「超整理術」先得。

係咁！
茶樹：懶就懶啦，講咁多做咩，等我鬧醒你啦...汪汪汪～

茶樹 • 寵愛《 61 》﹣ 茶樹新知

諗住茶樹已經大定，近期我先發現，
係佢身體同行為上，原來不斷有啲小改變。

以前全黑嘅佢，兩隻後腿上嘅「雞髀」位，
生咗好多白色嘅毛，都是剪咗短毛後先知道...
我就諗：有一日，茶樹會唔會全隻變咗灰色哩？
因為佢阿爸阿媽係一黑一白...

茶樹淚線出奇發達，我晚晚都幫佢抹面仔，
但係都仲有大大粒眼屎。而且啲凹咗落去嘅牙仔，
真係好鬼啡...

佢有一輪好鐘意上床瞓，最近整整吓又唔制，
係床玩一陣都係要落番床...其實都好，
咁我唔駛係床硬晒駄怕整親佢...

仲有最勁嘅係...

佢唔知點解，好鍾意嗬尿係尿片底，
注意佢唔嗬係地下或者塊膠板底喎,
而係尿片同塊板之間。有幾次我換片，
揭開先知裡面有一大篤...

我懷疑因為而家佢太肥，或者懶咗，
唔行正中間就嗬...總之古靈精怪！

唔通佢開始步入青春少女嘅反叛期？


茶樹：你而家叫數我啦喎！你唔係度邊個幫你睇住頭家吖吓...！

隨流感想

感染豬流感的數字不斷上升，在新增個案中，
很多人的病情也趨向嚴重。可是在日常生活裡，
除了在地鐵車廂看到多了人配戴口罩之外，
不見得香港人有什麼特別的危機感...

可能，只是我沒有危機感。

但話說回來，除了勤洗手和注意衛生外，
其實都沒有什麼好方法了。何況做了這些功夫，
也不見得可以絕對防止感染到病菌...
與其每天擔憂地生活，不如樂天知命，
放開地照常去過，我相信這是大部份港人的想法。

為何想這些東西？夜欄人靜，剛才與茶樹對望，
就想到如果我病倒了，茶樹要怎麼樣呢？

看着日益膨脹的身體，便感到自己的不健康。
也許下次放茶樹去跑，我也要認真的跑一跑。


茶樹：下次我放你跑吖～咩呀！！

估佢唔到殺人犯

先旨聲明，想睇而又未睇嘅，千祈唔好睇落去，
小弟唔多唔少會穿少少穚！

我要講嘅係電影「殺人犯」。

本來想睇「極速緋聞」嘅我，因為港島無咩戲院仲上緊，
唯有先睇另一套心水「殺人犯」。其實全院差唔多爆咗，
不過一個人睇戲就真係易買飛啲。我之前無睇過片頭，
無睇過任何雜誌影評，可以講得上係白紙一張入場。

睇完之後，好頭痛！

我頭痛意思唔係套戲差，我其實覺得好好睇！
尤其以港產片嚟講，真係幾少有。只係睇完之後，
真係幾sad，好鬼唔開心，屈住屈住咁。

返嚟上網睇番人哋啲影評，讚同彈都各佔一半。
當然有人會鬧城城浮誇，又話故事犯駁，
一味係度賣弄血腥，唔似邊套西片咁有深度咁。
我其實都唔反對，對我嚟講，故事係滿分！
因為我真係估佢唔到，而且我竟然覺得好寒，
我睇「康州驅魔實錄」都無，佢一路解畫，
有幾個位寒到我吖！至於犯駁與否，我覺得已經拍得好通，
仲會令我諗番好多前面啲片段，心裡面暗叫：
「唔怪得之前硬係覺得怪怪哋啦！」

另外，我好鍾意個開場，同埋啲風境大wide shot，
滿天都係鷹，好平靜嘅湖，對狂爆嘅故事形成强烈對比。
其實睇得出城城好盡力做，但係感覺佢啲文戲唔夠放鬆，
成日都起晒槓咁，不過啲暴燥表情係佢强項，都幾到。
而我最欣賞佢開焗爐個反應，真係好好。

總括嚟講，我點都會叫人入場睇。香港電影，
好少有哩啲戲啦！有人話係導演有具心扮西片，
我覺得人地係有誠意啫。有時唔駛吓吓同人地套戲比，
人地果套玩得盡又要跟，第二套好多批判思想又要跟，
咁不如睇番人地果套算啦！

講真，拍戲唔係一定要好深層次啫。

不過少女們，切勿唔敢睇遮晒眼，又係度狂問男友而家點，
我會鬧爆你哋！

別要夢遺

作為打工仔，很難避免每天都過着重覆的生活。

重覆，代表有紀律，也可解作乏味。

由星期一早上睜開眼睛開始，相同的車程，
不變的早餐，差不多的工作，見慣了的情境...
就算樣樣順利完成，但日子久了，總會悶。

然而有不少破解方法。如果你有錢有假有伴的話，
當然可以去瞬間看地球。又或者在放工後，
盡情參予一切酒吧活動，是娛樂是放鬆或發洩都好，
務求每天回家便可過倦入眠。

一年前，我每逢星期五的晚飯地點都要在深圳，
因為無論食物環境還是深圳街頭，都令我開了眼界，
新鮮感十足。在飽覽各式平貴美食後，指定動作
便是再到酒吧熱舞一番。但人就是善變的，
一旦連娛樂都是不斷地重覆，享受都會變成無感覺...

就是這個純粹求變的心態，今年五月初，
我參加了一個錄像比賽，馬馬虎虎的劇本，
拖拖拉拉的進度，總算真的順利拍完了。
會得獎嗎？不知道，心裡總覺得勝算不高！
但又如何哩？就如六合彩攪珠前的幻想，
我已令自己發了一個好夢，於我而言，
這是值得為自己驕傲的開心事。

未來的幾個月，我將會發一個更大的夢，
認真程度連自己都有點驚訝！

因為我要拍更長的片，而且還要參加IFVA。

上次「發夢」，聚集了幾個有心有力的「同志」，
這次，就讓我們發個更轟烈的美夢！

雖然興奮，但別要夢遺。





鳴謝所有仗義的同志們！

茶樹 • 寵愛《 60 》﹣ 小忌廉

「是我叫牠走的！」

昨天，CM告訴我，忌廉走了。

十多年前初認識CM，他家裡有只有一頭小狗。
牠便是忌廉，是一頭西施狗女。

忌廉聲音洪量，而且對訪客絕不客氣。
你進門口時牠吠你，你坐下來不動又吠你，
但你坐得久了，你稍為有點小動作又吠你...

我那時見牠吠得太兇，便作勢罵牠，
牠便邊吠邊向後移，走入茶几底繼續發惡。
但別以為牠得把聲，當我罵完後，在我轉身
的電光火石之間，腳上一痛，小腿即時掛彩！
我揭起牛仔褲管檢查傷勢，發現兩個小紅點，
正在緩緩地躺血，隱隱作痛...

如今，忌廉差不多十六歲了，對狗來說已是高齡。
牠的叫聲依舊不變，只是反應變得很慢。
CM很清楚忌廉時日無多，心裡已作最壞打算。
幾星期前，CM發現忌廉躺在廳中地上四腳亂抓，
卻又站不起來，情況持續兩天。

彌留之際，CM正為忌廉清理身上的污垢，
期間在牠身上輕拍，告訴牠別要勉强自己受苦，
舒服點走便好！然後，忌廉終於在CM手中過身了。
CM告訴我，忌廉應該知道自己不行了，
但在最後的生命裡，總想留在CM身邊才肯合上眼睛...

作為聆聽者的我都濕了眼眶，何況那時那刻的CM...

然後，我看着快兩歲大的茶樹，泛起一絲不安與難過。






茶樹&茶樹老豆：忌廉R.I.P.

身痕

最近，想攪機！

吖唔係，其實係想買一部單鏡反光相機。

其實我對電子產品無咩研究。例如我唔識砌電腦，
咁大個仔都只係買過一部手提電話，無高清電視，
另外用咗六年嘅數碼相機，都係以前女友送嘅...

有一晚，同一位有影snap shot習慣嘅朋友MSN,
佢提議我買Olympus將會新出果部E-P1，
唔睇無事，一睇就中招！因為真係幾靚仔喎。
我無咩攝影經驗，又無鍾情邊隻相機牌子，
只係對Olympus感覺唔差。

如果話我買嚟想學影相，啲行家個個都話哩部麻麻！
咁我當普通DC用啦，又有人會話唔駛買咁貴DC...
最慘嘅係，我都覺得佢哋講得有道理！
何況價錢相對其他DC都唔係平。

不過人有時係咁衰，明知啲嘢唔係最實用，
你又偏偏會死心塌地咁鍾意。原理好簡單，
正如你買衫，都唔會因為件衫夠多袋而買呱，
功能同實用性，有時都敵唔過外面。

希望見到現貨果陣，有得平啲同埋質數好啦！


茶樹：「一早要買啦，成日影到我黑到一PET咁！」
茶樹老豆：「咁你本身係黑到一PET有咩計～」



白色好鬼靚仔！