借刀殺人

徹夜未眠，又無心情睇碟，正值歐國杯開波時間到，
致電「雨公」出外睇波，原來他人已在現場。
立即飛的趕到灣仔某茶餐廳觀戰。

是日意大利大戰法國，邊隊贏邊隊出線。
「雨公」一路睇一路叫悶，我也有同感，
好彩有一班夜更的士司機在現場「攪氣氛」。

好明顯，他們不是第一晚聚集睇波，互相早已認識，
所以，當其中一位司機大佬發表足球偉論時，聲音都會
提高八度，甚至九度！務求前後左右都清楚收到，
基本上同演講無分別，我？當然係「侷聽」啦。

一位面青青司機先由上上屆世界杯講起：
「巴西如果唔係收咗錢先輸俾法國我就咩都得！」
語氣肯定到好似自己有份收錢咁！然後講到今場波的
出線問題，比數幾多就對邊隊有好處，邊隊波要走線咁，
全場司機你一言我一語，更互相質疑大家記憶出錯，
將話題提升至數學層面。

一位肥司機大喝一聲：「（先一句粗口）唔好拗啦！
我出去買份報紙咪知囉，人哋寫得好清楚啦。（再一句粗口）！」
肥司機真的飛奔出外買了報紙，認真程度媲美立法會辨論。

意大利領先法國二比零時，面青青司機又再高呼：
「啊！我諗到點解要二比零啦，哩招叫做『借刀殺人』，
頭先我就係計漏咗哩一步！」

我同「雨公」再頂唔順，即時爆笑。

突然想起老媽一句話：「如果你讀書係咁好心機就好啦！」