樂
「人生有幾多個十年?」柴九問喎...
「我已經過咗三個有多...」
咁大個仔,自己鍾意食乜着乜做乜又點會唔知。
以前做嘢忙到嘔,有咩想做想攪都得個諗字,
整整吓,最後索性諗都唔諗。
好耐之前有一份工,時間幾穩定,
突然上進心起,讀咗兩年夜間多媒體課程,
今時今日,好多內容都已經連本帶利俾番阿蛇。
不過當時有一堂我超鍾意,就係「剪片」課程。
教得剪片,當然會教埋拍嘢。
就係哩個科目,令我認識好幾個同班老死,
為咗份功課,成班傻傻吓係人地屋企喪拍,
又霸住人地大廈部電梯係咁拍,又拍撞車,
係街頭用晒血漿,反光板拍足三個週末。
然後晚晚收工一齊剪片...哩段美好時光,
絕對可以入選我人生最十大最開心事件。
多年之後當然都會成日諗番,又攞番條片回味。
不過回味得多,都有啲悶悶地。個零月前一晚放工,
係見到地鐵電梯有個EC廣告,原來係個短片比賽,
用三秒時間記住網址,上網一查,發覺玩得過,
打番電話俾啲師兄弟,大家都話有興趣,
二話不說拿拿聲度故事搵地方,如是者...
哩個禮拜六晚開拍啦。
我地當然只係屬於玩票性質,或者係自娛,
所以無諗輸贏,最緊要係所有參予人仕都開心,
何況預備過程都已經好好玩,係發自內心嘅喜悅,
真係有錢都買唔到...
所以話,開心同浪漫一樣,係可以自製嘅!
好彩當初有辭咗果份無日無夜嘅工啫~~
期待拍攝當晚,我講果句好耐無講過嘅:
「Camera Ready... Action!」
2 comments:
enjoy then! ^0^
完咗俾大家睇睇!
Post a Comment