香港人壓力大，怕失業怕無錢怕俾老公打怕乜怕物，
精神長期崩緊，思緒陷入膠着狀態，好多人表面正常，
其實裡面都係「壓力煲」，睇上去正常好地地，
背後可能已經攪咗場大龍鳳。
平日遇到周遭有傻佬大聲胡言亂語，最多運路行避之則吉。
去HMV，見到不知洗頭水為何物，當自己去咗Neway嘅電車男，
我會走過兩行先至搵歌聽。又試過喺地鐵有人企正喺車箱中間，
挨住碌柱，成個中央領導人咁演講香港時事，十二生肖都迴避其目光，
我反而可以一笑置之，當去咗城市論壇，加多個食飯話題。
總之怪人度度有，不過，如果有位精神有問題嘅人，
佢同你係夾路相逢，而且日日相見，咁你就大電視。
啱啱我屋企樓下就有一位。
呢位瘋癲女仕，外面十分正常，年紀同我相若。
你望住我同佢，可能你會話我似傻佬多過佢似癲婆，
此女行徑極端，總之外面斯文，行為擾人。
「往績」包括：
1. 將廢紙傳單postcard貼滿自己門口，再加上甩色Marker大字，
內容古靈精怪九唔答七，及後「墨寶」更伸延至地下信箱。
2. 唐樓樓梯闊度有限，佢就當正係自己嘅真我工作坊。
擺到一地雜物，有衫有水有垃圾有膠箱有舊雜誌應有盡有。
3. 更嚴重會放天拿水火水桶一堆玻璃樽喺正路中心，
仲有包新開嘅炭。
起初只係玩靜物裝置藝術，整整吓開始嚟料，
有一次佢無帶鎖匙入唔到屋，悶悶哋喺門口燒雜誌，
好彩我咁啱返去餵茶樹先發現，我拿拿聲落去用水淋熄啲火，
佢笑笑口當無嘢，但係啲煙入晒我間屋。
之後有半夜喪掉玻璃樽去樓梯轉彎位，嘭嘭聲咁爆晒樽。
加埋啲光管碎一地都係，我開完夜返嚟以為打完仗，
仲有啲天拿水味充折四周，我即晚報警備案，
再單聲俾消防知。最奇係佢每次攪亂幾日，
就自己會清理番，當然好多污漬喺清潔唔到。
講真，都擔心佢再玩火。
最新作品係今日，我頂佢當正自己係曾灶財，
倒到一地都係古怪顏料，仲開始係牆身畫公仔。
俾我撞正佢呢單暴行，我話佢我點落樓，
佢老闆問番我對鞋貴唔貴，叫我照行印啲腳印落樓下，
笑住話好好玩。
佢無傷人(暫時)，頂多叉佢無公德心，
我check過最多向食環署投訴，如果報消防，
都只可以睇吓有無違反防火條例。
每日都要行經佢門口，硬食佢嘅所作所為。
除咗搬，我可以點做呢？
茶樹：「老豆你係咁俾嘢我咬，唔係諗住放狗做嘢呀嘛...」茶樹老豆：「佢試吓整親妳，老豆就真係做嘢啦...」
1 comment:
hey, did you tell daddy about that woman? But she's downstairs? not related to "ah yeah's" property?
Post a Comment