大你一百萬零一夜

莫講話電影，就算係旅遊特輯或宣明會節目，
我都好少留意到印度。

今晚收工好想搵套戲睇，行到翡翠明珠門口，
唔駛諗就揀咗揚威奧斯卡嘅Slumdog Millonaire，
因為無理由睇「潮拜購物狂」呱！非我杯茶。

睇完套戲，老實講，如果硬係要感性起上嚟，
可以係戲中帶出嚟嘅道理，又何止一百零一個。
我睇戲有個習慣，如果套戲我大多數會入場睇，
我會用盡方法，對該電影一切相關廣告完全避開，
務求令自己以「處子」之身去迎接入場後嘅120分鐘！
但係好衰唔衰，無論點避，個片名都露咗底...
不過你以為你估到晒咩，原來好多段又真係估佢唔到！

好戲無謂洩露天機，都係講吓Ｄ感受算啦！
好似一路睇一路會諗起「海角七號」，甚至「香港製造」，
因為都係以當地社會文化同問題去串起整個故事。
另外又好驚訝Ｄ細路咁好戲！七情上面勁到爆...
攪到我睇到個心鬼咁酸。講真百萬富翁個個都睇過，
但係真係無諗過可以生一個咁好嘅故事。
最神奇係散場果陣，會有種幻得幻失哭笑不得嘅感覺，
攪到唔知應該好開心咁離場，定係好傷感咁返屋企好...

總之係好睇，唔想俾其他人穿晒內容快Ｄ仆倒去睇啦！

唔知陳啟泰有無睇哩？


戲中出現咗隻狗，令我深深感受到做狗仔都有好命同唔好命！
茶樹：「咁我跟着你條友係好定唔好先？」